चंद्र. . .

आभाळाच्या ओठांवरती
सांजधुनीची केशर गाणी
आणिक क्षितिजाच्या भिवईवर
चांदणरेषा लोभसवाणी...

लोभसवाणी त्याहून असते
चंद्रावर आरास रुप्याची
पूर्ण पौर्णिमा अजून बाकी
तरी मोहिनी कलेकलेची...

कलेकलेसम रोज उजळतो
चांद देखणा झाडामागून
तीट काजळी अंधाराची
सभोवताली घेतो लावून...

घेतो लावून सवय उगाचच
रात्र रात्रभर जागायाची
आणिक नक्षत्रांच्या गावी
अवघड वळणे मागायाची...

मागायाच्या त्यालादेखील
लाख तारका रोज रोज पण,
त्यांच्याहीपाशी स्वप्नांची
पखरण करते हळवेसे मन...

हळवेसे मन चंद्रामागून
फिरते, झुरते.. तळमळतेही
कुणा प्रियाच्या आठवातुनी
भरल्या डोळ्यांतून गळतेही...

गळणा-या चांदणपाण्यातुन
रात्र होतसे शुभ्र नितळशी
शुक्ल, क्रुष्ण मग रोजच होतो
चंद्र नांदता या डोळ्यांशी...

पूजा भडांगे बेळगाव